Қазақстанда мүмкіндік көп, әсіресе оны көре білетін және жіберіп алмайтын жандар болса, тіпті ғажап. Биыл қай салаларда жақсы табыс бар, аз ақшамен қалай кәсіп бастауға болады? Бұл туралы Tamga Media материалынан оқыңыз.
Жабайы табиғатқа саяхат: гид болу және тур ұйымдастыру
Bloomberg агенттігі 2025 жылдың соңында Қазақстанды 2026 жылы міндетті түрде бару керек әлемдегі ең үздік 25 елдің тізіміне қосты. Сондықтан бұл сала бірден алдыңғы қатарға шықты. Көлсай, Қайыңды, Катонқарағай мен Маңғыстау сияқты жерлерге қызығатын туристер күннен-күнге көбейіп жатыр. Істі бастау үшін көп ақша жұмсаудың қажеті жоқ, өйткені баратын жолды жақсы білсеңіз, көлігіңізге адам жинап, бірден гид бола аласыз.
Дәл осылай шетел азаматтары үшін жайлаудағы жазды көрсетіп, арнайы турлар ұйымдастыруға болады. Тек оларға ұзағырақ маршрут сызып, қызық жерлерді, көлікті және дәмді тамақтанатын орындарды алдын ала ойластыру керек. Мұнда ағылшын тілінде сөйлейтін қонақтарға мән берген дұрыс. Өйткені еліміз туралы ағылшынша ақпарат іздейтіндер көп, ал гидтер аз. Бастапқыда WhatsApp топтары, Instagram мен хабарландыру сайттары арқылы адам жинауға болады. Басқа гидтерден ерекшеленетін «фишкаңызды» тапсаңыз, бұл маусымда жақсы табыс таба аласыз.
Үй өнімдерін сатып табыс табу
Құрамында химия жоқ, «әжемнің қолдан жасағанындай» таза өнімдерге сұраныс өсіп жатыр. Тіпті Памела Андерсонның өзі үй консервациясын сата бастады. Түрлі тосап, соус, тұздалған қияр-қызанақ пен жартылай фабрикаттар қашан да керек. Әсіресе өнімнің өзіне тән ерекшелігі, сыртында әдемі жапсырмасы мен дәмі жақсы болса, сұраныс одан сайын артады. Ең жақсы дайындай алатын тағамыңызды таңдап, оның қаптамасын ойластырыңыз да, шығынын есептеп, жасап көріңіз. Тауарды таныстар арқылы немесе әлеуметтік желіде сатуға болады. Бұл – декрет демалысында отырған аналар үшін де жақсы мүмкіндік. Ал ісіңіз алға жылжып жатса, уақыт өте келе мұны үлкен бизнеске айналдыра аласыз.
Балаларға арналған күндізгі лагерь мен көшпелі үйірмелер
Жаз келісімен ата-аналар «баланы қайда жібереміз?» деп бас қатыра бастайды. Сондықтан мектеп оқушыларына аптасына бірнеше сағатқа болсын пайдалы іспен айналыса алатын орындар керек-ақ. Сурет сала алсаңыз, спорт немесе робототехника сияқты істер қолыңыздан келсе, үйірме ұйымдастырып, табыс табуға болады. Мұндай бизнесті бала көп, үлкен тұрғын үй кешендері мен көпқабатты үйлердің маңында ашқан тиімді. Сонда клиент те тез табылады.
Фотограф және контент-мейкер
Бұл – саяхаттап жүріп ақша табудың жақсы жолы. Дайын турларға ілесіп немесе адам көп баратын жерлерде қызмет ұсынуға болады. Қазір қарапайым суреттен гөрі әлеуметтік желіге арналған креатив фотолар мен ерекше ракурстан түсірілген видеолар өтімді. Мысалы, Үлкен Алматы көліне, Алакөлге немесе Маңғыстау шатқалдарына баратындар әдемі фото-видео қалайды, бірақ өздері түсіре алмайды. Мұндай саяхатта бір түсірілімге 15 000 теңгеге дейін алсаңыз болады, бұл – нарықтағы тиімді баға.
Пикникке арналған керек-жарақты жалға беру
Жұрттың бәрі табиғатқа шыққанды жақсы көреді. Бірақ көбіне үйден ескі көрпешесі мен пакетке салынған нан-шұжығын ала салады. Сіз осы демалысты әдемі әрі ыңғайлы ете аласыз. Клиентке пикникке арналған дайын жинақ жасап, апарып беріңіз: ішінде дастарқан, ыдыс-аяқ, жастықтар, мангал және дайын тамақ (бутерброд пен маринадталған ет). Демалыс біткен соң заттарды өзіңіз жинап аласыз. Адамдар ыдыс жумай, ештеңеге бас қатырмай, рахаттанып демалады. Істі бастау үшін Instagram-ға әдемі суреттер салсаңыз жеткілікті, әрі қарай клиенттер бір-бірінен естіп, өздері-ақ келеді.
Түнде далаға экскурсия ұйымдастыру
Исландия, Моңғолия мен Намибияда туристерге жұлдызға толы аспанды көрсету трендке айналған. Ал қазақтың кең даласынан көрінетін жұлдыздар – Азиядағы ең әдемі көріністердің бірі. Қаланың қарбаласынан шаршаған жандар ашық аспан астында қонып, даланың энергиясын сезінгісі келеді. Бұл істі бастау үшін қауіпсіз әрі әдемі маршруттарды білу керек және ең қажет заттарды (шатыр, ұйықтайтын қап, телескоп пен әдемі декор) дайындау керек. Бастысы, мұны жай ғана қызмет емес, адамға ерекше әсер сыйлайтындай ету қажет.
